उपप्रधान एवं संघीय मामिल तथा स्थानीय विकास मन्त्रीलाई ज्ञापन–पत्र

काठमाण्डौ चैत्र–१६
उपप्रधान एवं संघीय मामिल तथा स्थानीय विकास मन्त्री प्रकासमान सिंहलाई नेपाल बौद्ध महासंघले बौद्ध दर्शन प्रवद्र्धन तथा गुम्बा विकास समितिको नियुक्ति र गोन्पाहरुको कर छुट सम्बन्धमा महासंघका वरिष्ठ सल्लाहकार खेन्पो ग्युर्मी छुल्ठीम, अध्यक्ष फुपु छेम्बे शेर्पा, महासचिव आचार्य नुर्बु शेर्पा लगयात सरोकारवाला संघ संस्थाका प्रतिनिधिहरुको उपस्थितिमा ज्ञापन–पत्र बुझाएको थियो ।

ज्ञापन–पत्रमा ‘बौद्ध दर्शन तथा गुम्बा विकास समिति’ विशुद्ध बौद्ध गोन्पाहरूको आधिकारिक धार्मिक सरकारी निकाय भएको हुँदा आगामि दिनमा नियुक्ति हुने अध्यक्ष, कार्यकारी निर्देशक र पाँच विकास क्षेत्रबाट नियुक्ति गर्ने सम्पूर्ण सदस्यहरूको नियुक्ति गोन्पाहरूसँग प्रत्यक्ष सरोकार राख्ने निकाय नेपाल बौद्ध महासंघको सिफारिशमा मनोनयन गर्नु पर्ने र यस समितिको २०६६ सालमा संशोधित गठन आदेशलाई समय अनुकुल पुनः सम्बन्धित सरोकार पक्षहरूसँग सहकार्य गरी अधिकार सम्पन्न स्थाई प्रकृतिको ‘‘बौद्ध दर्शन तथा गोन्पा विकास परिषद्’’ मा रूपान्तरण गर्नु पर्ने माग रहेको छ ।
समय, समयमा वडा कार्यालयहरूबाट मौखिक तथा लिखित रूपमा गोन्पाहरूलाई कर बुझाउनका लागि पत्रचार गरिएको हुँदा स्थानीय स्वायत्त ऐन २०५५ र आयकर ऐन २०५८ मा ‘धार्मिक संस्था (मन्दिर, गुम्बा, चर्च, मस्जिद आदि) को भवन र जग्गा, यस नियम बमोजिम एकीकृत सम्पत्ति कर लागेको सम्पत्तिमा मालपोत, भूमिकर तथा घरजग्गा कर लगाइने छैन’ भनि स्पष्ट रूपमा उल्लेख भएकोले यस सम्बन्धमा पनि ध्यान आकर्षण गराएको थियो ।