नेपाल बौद्ध महासंघको भावी कार्ययोजना प्रस्तुत, रिन्पोछेज्यूबाट आशीर्वचन

काठमाडौँ, चैत्र २ गते – नेपाल बौद्ध महासंघले क्याब्जे राब्ज्यम रिन्पोछेज्यूको प्रमुख आतिथ्यतामा एक विशेष कार्यक्रम आयोजना गरेको छ । यस कार्यक्रममा महासंघका भावी कार्ययोजना प्रस्तुत गरिएको थियो, साथै सल्लाह–सुझाव संकलन र सहयोग अनुरोध पनि गरिएको थियो । कार्यक्रममा नेपाल बौद्ध महासंघका सल्लाहकार, चारै परम्पराका अध्यक्ष तथा प्रतिनिधिहरू, र विभिन्न क्षेत्रका समाजसेवीहरूको सक्रिय सहभागिता थियो ।

 

कार्यक्रमको शुरुआत नेपाल बौद्ध महासंघका अध्यक्ष नुर्बु थुन्डु शेर्पा (गेशे थुप्तेन जिन्पा) द्वारा महासंघको स्थापनाकालदेखि हालसम्मका कार्य प्रगतिको विवरण प्रस्तुत गरिँदै गरिएको थियो । अध्यक्षले वर्तमानमा सञ्चालन भइरहेको बौद्ध शिक्षा र संरक्षणका कार्यक्रमहरू, दीर्घकालीन दायित्वहरू, र सामुदायिक नेतृत्वको महत्त्व विषय समेत उजागर गर्नुभयो । उहाँले महासंघको भावी कार्ययोजनामा बौद्ध शिक्षाको विकास, जनशक्ति उत्पादन, र अन्तरधार्मिक सहिष्णुता जस्ता प्रमुख बिषयहरूमा कार्य गरिने जानकारी दिनुभयो ।

 

कार्यक्रमको प्रमुख अतिथि, श्रद्धेय क्याब्जे शेचेन राब्ज्यम रिन्पोछेज्यूले महासंघको स्थापना र यसका कार्यहरूको प्रशंसा गर्दै भन्नुभयो, "नेपालका हिमाली समुदायहरूको आआफ्नो छुट्टै पहिचान रहेको छ र यिनीहरू विश्वभरि प्रसिद्ध छन् । यस समुदायको भाषा, धर्म र संस्कृति अत्यन्त महत्त्वपूर्ण छ ।" रिन्पोछेज्यूले सम्पूर्ण हिमाली समुदायहरुले बालबालिकाहरुलाई विद्यालय स्तरबाटै बौद्ध शिक्षा र परम्पराहरू सिकाउनुमा एकताबद्ध हुनुपर्ने आशीर्वचन पनि दिनुभयो । साथै, उहाँले आर्थिक सहयोग पनि गर्नुभएको थियो ।

 

कार्यक्रममा उपस्थित समाजसेवीहरूले नेपाल बौद्ध महासंघको प्रगति र भविष्यका योजनामा आवश्यक सहयोगका बारेमा मन्तव्य राख्दै, कार्यक्रम स्थलमै आर्थिक सहयोग गर्नुभएको थियो । साथै, धेरै जनाले आर्थिक सहयोगको प्रतिबद्धता जनाएका थिए ।

अध्यक्षज्यूले "यस कार्यक्रमले नेपाल बौद्ध महासंघको कार्यलाई थप मजबुत बनाउने र बौद्ध शिक्षा परम्परालाई ग्रामिण क्षेत्रका जनसमुदायसम्म पुर्याउनमा थप टेवा पुग्ने विश्वास व्यक्त गर्दै सबै जनालाई धन्यवाद गर्नुभएको थियो।"